ଖୋର୍ଦ୍ଧା (କୋଶଳ ପ୍ରହରୀ) : ଲଗାତାର ବର୍ଷା ଓ ଉପରମୁଣ୍ଡରୁ ଆସୁଥିବା ଜଳପ୍ରବାହ ପ୍ରଭାବରେ ଚଳିତ ବର୍ଷର ପ୍ରଥମ ବନ୍ୟାଜଳ ଖୋର୍ଦ୍ଧା ଜିଲ୍ଲାରେ ପ୍ରବେଶ କରିଛି। ମହାନଦୀର ଶାଖାନଦୀ ରାଜୁଆ ଓ ଦୟାର ଜଳସ୍ତର ବୃଦ୍ଧି ପାଇବା ସହ ଖୋର୍ଦ୍ଧା ବ୍ଲକର ନରଣଗଡ଼, ଓରବରସିଂହ, ବ୍ରଜମୋହନପୁର ସମେତ ଅନେକ ପଞ୍ଚାୟତର ତଳିଆ ଅଞ୍ଚଳ ଜଳମଗ୍ନ ହୋଇଛି। ବିସ୍ତୀର୍ଣ୍ଣ ଚାଷଜମି ବନ୍ୟାଜଳରେ ବୁଡ଼ିଯିବା ସହ ସଡ଼କ ଉପରେ ପାଣି ପ୍ରବାହିତ ହେଉଥିବାରୁ ଯୋଗାଯୋଗ ବ୍ୟବସ୍ଥା ବାଧାପ୍ରାପ୍ତ ହୋଇଛି। ହୀରାକୁଦ ଜଳଭଣ୍ଡାରର ଗେଟ୍ ଖୋଲାଯିବା ପରେ ରାଜୁଆ ନଦୀରେ ଜଳପ୍ରବାହ ବଢ଼ିଥିବାରୁ ଓରବରସିଂହ ପଞ୍ଚାୟତର ହିରିମୂଳ ସଂଯୋଗ ସଡ଼କ ଉପରେ ବନ୍ୟାଜଳ ପ୍ରବାହିତ ହେଉଛି। ଏଥିଯୋଗୁଁ ସ୍ଥାନୀୟ ଲୋକଙ୍କ ଯାତାୟାତ ପ୍ରଭାବିତ ହୋଇଥିବା ବେଳେ ବହୁ ପରିବାର ସମ୍ଭାବ୍ୟ ଦୀର୍ଘସ୍ଥାୟୀ ବନ୍ୟାକୁ ଦୃଷ୍ଟିରେ ରଖି ପୂର୍ବପ୍ରସ୍ତୁତି ଆରମ୍ଭ କରିଛନ୍ତି।
ପ୍ରଥମ ଦିନରୁ ହିଁ ଶହ ଶହ ଏକର ଧାନଜମି ବନ୍ୟାଜଳରେ ବୁଡ଼ିଯାଇଛି। ଚାଷୀମାନେ କହିଛନ୍ତି, ପାଣି ଆହୁରି କିଛି ଦିନ ରହିଲେ ଧାନ ଚାରା ସମ୍ପୂର୍ଣ୍ଣ ନଷ୍ଟ ହେବାର ଆଶଙ୍କା ରହିଛି। କୃଷିଭିତ୍ତିକ ଅର୍ଥନୀତି ଉପରେ ନିର୍ଭରଶୀଳ ଏହି ଅଞ୍ଚଳରେ ବନ୍ୟା କୃଷକଙ୍କ ଜୀବିକା ଉପରେ ବଡ଼ ପ୍ରଭାବ ପକାଇଛି। ହିରିମୂଳ, ଡିହଖଳା, ରାୟପୁର, ଦୁର୍ଗାପୁର, ମଶାଣିଆ, କୃଷ୍ଣପୁର, ତେନ୍ତୁଳିମୂଳ, ବଳପୁର, ଶରଧାପୁର, ଓରମି, ମାନପୁର, ହାଡ଼ପଦା, ନରଣଗଡ଼ ଓ ଧବଳପୁର ସମେତ ବହୁ ଗାଁରେ ବନ୍ୟାର ପ୍ରଭାବ ବଢ଼ିବାରେ ଲାଗିଛି। ସ୍ଥାନୀୟ ଲୋକଙ୍କ ମଧ୍ୟରେ ବାହ୍ୟ ଜଗତରୁ ବିଚ୍ଛିନ୍ନ ହେବାର ଆଶଙ୍କା ଦେଖାଦେଇଛି। ଏହି ପରିସ୍ଥିତିରେ ଖୋର୍ଦ୍ଧା ଜିଲ୍ଲା ବିଜେଡି ସଭାପତି ରାଜେନ୍ଦ୍ର କୁମାର ସାହୁ ଏବଂ କାର୍ଯ୍ୟକାରୀ ସଭାପତି ମନ୍ମଥ ରାଉତରାୟ ଡଙ୍ଗାରେ ବନ୍ୟାପ୍ରଭାବିତ ହିରିମୂଳ ଓ ଡିହଖଳା ଗ୍ରାମ ପରିଦର୍ଶନ କରି ପ୍ରଭାବିତ ଲୋକଙ୍କ ସହ ଆଲୋଚନା କରିଥିଲେ। ସେମାନେ ଚାଷଜମି, ଜଳମଗ୍ନ ସଡ଼କ ଓ ଗ୍ରାମର ସ୍ଥିତିର ସମୀକ୍ଷା କରିଥିଲେ।
ପରିଦର୍ଶନ ପରେ ବିଜେଡି ପ୍ରତିନିଧିମାନେ ଅଭିଯୋଗ କରିଥିଲେ ଯେ ବନ୍ୟା ମୁକାବିଲା ପାଇଁ ରଖାଯାଇଥିବା ଦୁଇଟି ଡଙ୍ଗା ମଧ୍ୟରୁ ଗୋଟିଏ ଅଚଳ ହୋଇପଡ଼ିଛି। ସେମାନଙ୍କ ଦାବି ଅନୁଯାୟୀ, ବନ୍ୟା ପ୍ରଭାବିତ ଅଞ୍ଚଳରେ ଏପର୍ଯ୍ୟନ୍ତ ରିଲିଫ ସାମଗ୍ରୀ ପହଞ୍ଚିନାହିଁ। ପାନୀୟଜଳ, ଶୁଖିଲା ଖାଦ୍ୟ, ପଶୁଖାଦ୍ୟ ଓ ସ୍ୱାସ୍ଥ୍ୟସେବାକୁ ନେଇ ଲୋକଙ୍କ ଚିନ୍ତା ବଢ଼ୁଥିବା ସେମାନେ କହିଛନ୍ତି। ରାଜେନ୍ଦ୍ର ସାହୁ ବନ୍ୟା ପରିସ୍ଥିତିକୁ ସରକାର ଗୁରୁତ୍ୱର ସହ ନେବାକୁ ଦାବି କରିଥିବା ବେଳେ, ମନ୍ମଥ ରାଉତରାୟ ତୁରନ୍ତ ରିଲିଫ ବଣ୍ଟନ, ପର୍ଯ୍ୟାପ୍ତ ଡଙ୍ଗା ମୁତୟନ ଓ କ୍ଷତିଗ୍ରସ୍ତ ଚାଷୀଙ୍କ ପାଇଁ ଆର୍ଥିକ ସହାୟତା ଘୋଷଣା କରିବାକୁ ଦାବି କରିଛନ୍ତି। ଅନ୍ୟପକ୍ଷରେ, ଜିଲ୍ଲା ପ୍ରଶାସନ ପୂର୍ବରୁ ସତର୍କତାମୂଳକ ପଦକ୍ଷେପ ନେଇଥିବା ଦାବି କରିଛି। ତେବେ ବର୍ଷା ଜାରି ରହିଲେ ଓ ନଦୀର ଜଳସ୍ତର ଆହୁରି ବଢ଼ିଲେ ଆଗାମୀ ୨୪ରୁ ୪୮ ଘଣ୍ଟା ମଧ୍ୟରେ ପରିସ୍ଥିତି ଅଧିକ ଗମ୍ଭୀର ହୋଇପାରେ ବୋଲି ଆଶଙ୍କା କରାଯାଉଛି। ବନ୍ୟାପ୍ରଭାବିତ ଲୋକେ ବର୍ତ୍ତମାନ ପ୍ରଶାସନିକ ସହାୟତା, ଉଦ୍ଧାର କାର୍ଯ୍ୟ ଓ ରିଲିଫ ବଣ୍ଟନକୁ ଅପେକ୍ଷା କରି ରହିଛନ୍ତି।
0 Comments